‘Ahi‘ahi‘i fakafonua ‘o e Emergency Mobile Alert

Ko hono ‘ahi‘ahi‘i fakafonua ‘o e Emergency Mobile Alert ko ha konga mahu‘inga ia ‘o hono fakapapau‘i ‘oku ngāue lelei ‘a e fa‘unga ngāué. Kumi ha ngaahi ola mo ha fakamatala fekau‘aki mo e ngaahi ‘ahi‘ahi fakafonuá.

Ko e ‘uhinga ‘oku mau ‘ahi‘ahi‘i ai ‘a e Emergency Mobile Alert

Ko e ‘ahi‘ahi‘i fakafonuá ko ha konga mahu‘inga ia ‘o hono fakapapau‘i ‘oku ngāue lelei ‘a e fa‘unga ‘o e Emergency Mobile Alert.

‘Oku tuku atu ‘a e ngaahi ‘ahi‘ahi fakafonuá ki he ngaahi taua telefoni to‘oto‘o ‘i Nu‘u Silá kotoa. ‘Oku mau ‘amanaki ko e lahi taha ‘o e ngaahi telefoní ‘oku nau malava ‘o ma‘u atu ‘a e fakatokangá. Na‘e hā meí he ‘emau savea ‘i he 2025 ki he mateuteu ko ia ki ha fakatamaki fakatu‘upakeé ‘a e laka hake ‘i he 92% ‘a e kakai na‘a nau ma‘u atu ‘a e fakatokanga ‘ahi‘ahí pe na‘a nau ‘i ai mo ha tokotaha na‘á ne ma‘u atu ia.

‘I he ta‘u ‘e ono kuo hilí, ne mau ma‘u ai ha ngaahi fakakaukau ‘e lauiafe ne fakahū mai meí he kakaí. Na‘e tokoni ‘eni kiate kimautolu ke fakalelei‘i ai ‘a e fa‘unga ngāue ki he Emergency Mobile Alert.

Ko e ‘ahi‘ahi fakamuimui tahá na‘e fakahoko ia ‘i he efiafi ‘o e ‘aho 25 ‘o Mē 2025. Koe‘uhí ko e to‘umahaki fakamāmani lahi ‘o e COVID-19, na‘e kaniseli ai ‘a e ‘ahi‘ahi fakafonua ‘o e Emergency Mobile Alert ‘i he 2020 mo e 2021. 

Ngaahi ola ‘o ha ngaahi savea tu‘u tau‘atāina na‘e fakahoko kau ki he ‘ahi‘ahi fakafonuá

Hili fakatou‘osi ‘o e ‘ahi‘ahi fakafonua ‘i he 2018 mo e 2019, na‘e tu‘utu‘uni ai ‘e he Ministry of Civil Defence & Emergency Management ke fakahoko ha savea tau‘atāina.

Naʻe sio ʻa e saveá ki he:

• tuʻunga ‘o e tokolahi ʻo e kakai naʻa nau maʻu ʻa e fakatokanga ‘ahi‘ahí,
• ‘uluaki ʻiloʻi ia kimuʻá, mo e
• ngaahi fakakaukau ʻa e kakaí.

Hili ‘a e ‘ahi‘ahi ‘i he ta‘u 2021 mo e 2022, na‘e fakakau ai ‘e he NEMA ha ngaahi fehu‘i ‘i he savea Annual Disaster Preparedness (Savea Fakata‘u ki he Tu‘unga Mateuteu ki ha Fakatamakí) ke ne fua ‘a e ola lelei ‘o hono ‘ahi‘ahi‘i ‘o e Emergency Mobile Alert.

Talu meí he savea ‘o e 2018, kuo fakalakalaka ki mu‘a ‘a e ngaahi me‘afua tefitó. Ko e toko hiva meí he toko hongofulu ‘oku nau ma‘u atu ha fakatokanga pe ‘oku nau ofi ki ha tokotaha ‘okú ne ma‘u atu ha fakatokanga.

‘I he 2025 na‘e fakahaa‘i mai ‘e he saveá:

• ko e 81% na‘a nau tui ko e Emergency Mobile Alert ko ha founga lelei ia ‘o e fakatokanga ki he kakai Nu‘u Silá ‘i ha me‘a fakatu‘upakē.
• ko e 81% na‘a nau tui ‘oku ‘ikai totonu ke lava ‘e he kakaí ‘o ta‘ofi (opt-out) ‘a ‘enau ma‘u atu ‘a e fakatokangá.