Fa‘u ha palani

‘E lava ke hoko ha ngaahi fakatamaki fakatu‘upakē ‘i ha fa‘ahinga taimi pē, ‘i ha fa‘ahinga feitu‘u pē, pea ‘oku ‘ikai ke fa‘a ‘i ai ha fakatokanga tōmu‘a ia ki ai. ‘Oku mahu‘inga ke fa‘u ha ngaahi palani ki he fakatamaki fakatu‘upakeé koe‘uhi ke ke ‘ilo‘i ‘a e me‘a ke fai ‘i he taimi ‘oku hoko ai ha fakatamaki fakatu‘upakē.

Fa‘u ha palani fakafāmili ki he ngaahi fakatamaki fakatu‘upakeé

‘Oku hanga ‘e ha palani fakafāmili ki he fakatamaki fakatu‘upakeé ‘o ‘ai ke ‘ilo ai ‘e he tokotaha kotoa pē ‘i homou fāmilí ‘a e me‘a ke fai ‘i ha fakatamaki fakatu‘upakē mo e founga ke mou mateuteu atu aí. ‘Oku tokoni ‘a e ‘i ai ‘o ha palani ke si‘isi‘i ange ai ‘a e ongo‘i mafasia ‘i he ngaahi tūkunga fakatu‘upakeé.

‘Oku totonu ke fakakaukau‘i ‘i ho‘o palani ki he me‘a ‘e hoko fakatu‘upakeé:

• ho ngaahi mālohingá, ngaahi fiema‘ú mo ho tūkungá
• ngaahi sitepu kuó ke ‘osi fakahoko ke mateuteu aí, mo e
• ngaahi tōnounou ‘i ho‘o palaní ‘oku fakalahi ai ho tu‘unga tu‘u lavea ngofuá ‘i ha fakatamaki fakatu‘upakē (mo e ngaahi founga ke fakalelei‘i ‘aki kinautolú). 

Fa‘u ha palani mo ho fāmilí ke mou haofaki ai ‘i ha fakatamaki fakatu‘upakē. Fakakaukau atu ki he ngaahi me‘a ‘oku mou fiema‘u ‘i he ‘aho kotoa pē pea fakakaukau‘i ‘a e me‘a ‘e hoko kapau ‘e ‘ikai ke mou ma‘u kinautolu.

Fakapapau‘i ‘oku fokotu‘utu‘u ho‘omou palaní mo ha ngaahi palani ki ha ngaahi fakatamaki fakatu‘upakē kehe ki he ngaahi feitu‘u ‘oku lahi taha ‘a ho‘omou ‘i aí.

Kimu‘a pea mou toki kamatá

Fakapapau‘i kuo mou ‘osi fakakaukau‘i kotoa ‘a e ngaahi fiema‘u ‘a homou fāmilí, kau ai mo e:

• Kakai faingata‘a‘ia fakaesinó
• Fanga ki‘i pēpeé mo e fānau iikí
• Fanga monumanú

Fa‘u ha palani ki he ngāue‘angá ki he ngaahi fakatamaki fakatu‘upakeé

‘I ha fakatamaki fakatu‘upakē, ‘e lava ke ke fihia ‘i he ngāué, ‘o ‘ikai ha‘o founga a‘u‘anga ki ‘api. Fa‘u ha‘o palani fakafo‘ituitui ki ha fakatamaki fakatu‘upakē ‘i he ngāue‘angá ke ke ‘ilo‘i ai pe ko hai ke fetu‘utaki ki ai ‘i he ngāué pea ‘ai ha palani ke ke a‘u lelei ai ki ‘api.

Fa‘u ha palani ki he ‘apiakó ki he ngaahi fakatamaki fakatu‘upakeé

Feinga ke ‘ilo‘i pe ko e hā ‘a e palani ‘a ho‘omou senitā ako‘anga tokamu‘á pe ‘apiakó ki he ngaahi fakatamaki fakatu‘upakeé.

• Fekumi ki he feitu‘u ‘oku nau fakamalumalu aí koe‘uhí ke ke ‘ilo‘i ‘a e feitu‘u te ke lava ‘o ‘ave mei ai ‘a ho‘o fānaú hili hano fakahā atu kuo “faka‘atā” ke fakahoko iá.
• Palani atu ki ha lue lalo pe heka pasikala ke ‘omai ai ‘a e fānaú, kapau ‘e lava. ‘E lava ke fihitu‘u ‘a e ngaahi hala ki he ngaahi ‘apiakó. ‘E lava ke fu‘u femou‘ekina lahi ‘a e ngaahi laine telefoní lolotonga ‘o ha fakatamaki fakatu‘upakē.
• Fakapapau‘i ‘oku ma‘u ‘e ho‘omou senitā ako‘anga tōmu‘á pe ‘apiakó ‘a ho ngaahi fakaikiiki fakamuimui taha ki he fetu‘utakí. ‘Oange kiate kinautolu ha lisi ‘o ha kakai ‘e toko tolu te nau lava ‘o ‘ave ‘a e fānaú kapau ‘e ‘ikai te ke lava ‘o a‘u ki ai.

Fa‘u ha palani ki he marae ki he ngaahi fakatamaki fakatu‘upakeé

Fa‘u ha palani ‘a e marae ki ha fakatamaki fakatu‘upakē ke tokoni ki homou marae ke nau mateuteu ai ‘i he tu‘unga lelei taha ‘oku ala malavá ki ha fakatamaki fakaenatula fakatu‘upakē.